Մերիլ Սթրիփը հիշել է Մելանյա Թրամփի սկանդալային կերպարը  

Մերիլ Սթրիփը կրկին բարձրացրել է ԱՄՆ առաջին տիկին Մելանյա Թրամփի ամենավիճահարույց նորաձևության ընտրություններից մեկի թեման՝ «I Really Don’t Care, Do U?» (Ինձ իսկապես չի հետաքրքրում, իսկ քե՞զ) կարգախոսով բաճկոնը, որը մեծ աղմուկ էր բարձրացրել 2018 թվականին։

Սթրիփը անդրադարձել է միջադեպին Vogue ամսագրի համար Աննա Վինտուրի հետ զրույցում։ Քննարկումը վարել է ռեժիսոր Գրետա Գերվիգը։ Մասնակիցները քննարկել են, թե ինչպես են իշխանության գլուխ կանգնած կանայք ստիպված հարմարեցնել իրենց ոճը՝ իշխանությունը ցուցադրելու և հասարակական սպասումները բավարարելու համար։

Դերասանուհին, որը շուտով կվերադառնա Միրանդա Փրիսթլիի դերին «Սատանան կրում է Պրադա» ֆիլմի շարունակության մեջ, խոստովանել է, որ ինքը «շատ մտքեր» ունի այս հարցի շուրջ։ Նրա խոսքով՝ ներկայիս առաջին տիկնոջը ուղղված ամենաուժեղ ուղերձներից մեկը կապված էր հենց այդ բաճկոնի հետ։ «Ամենաուժեղ հայտարարությունն այն էր, երբ նա միգրանտ երեխաներին այցելելուց առաջ կրում էր «Ինձ իսկապես չի հետաքրքրում, իսկ քե՞զ» գրությամբ բաճկոն», — նշել է Սթրիփը։ Նա ավելացրել է, որ հագուստը միշտ ինքնադրսևորման միջոց է, բայց կանայք նաև ազդվում են ավելի լայն քաղաքական և պատմական սպասումներից։

Ավելի ուշ դերասանուհին ընդլայնել է այս թեման՝ խոսելով կանանց ընդհանուր վիճակի մասին։ Նրա կարծիքով, նույնիսկ այսօր իշխանության գլուխ գտնվող կանայք բախվում են որոշակի տեսք ունենալու անխոս ճնշման։ «Ինձ համար զարմանալի է, որ հեռուստատեսությամբ կանանց հաճախ ստիպում են մերկացնել ձեռքերը, մինչդեռ տղամարդիկ մնում են լիովին հագնված՝ վերնաշապիկներով, փողկապներով և կոստյումներով։ Դրանում կա ապոլոգետիկայի տարր, կարծես կինը պետք է ավելի փոքր երևա», — ասել է Սթրիփը։

Նա ավելացրել է, որ սա մի տեսակ փոխհատուցում է կանանց վերջին տասնամյակների նվաճումների համար, որոնք դեռևս ընկալվում են որպես անկայունացնող։

Աննա Վինտուրն իր հերթին նշել է, որ այսօր այլևս անհրաժեշտ չէ հավատարիմ մնալ դասական «ուժային կոստյումին»՝ հեղինակավոր երևալու համար։ Նա որպես օրինակ բերել է Միշել Օբամային՝ ընդգծելով, որ նա միշտ պահպանում է իր անհատականությունը՝ անկախ հագուստի ապրանքանիշից։

Վինտուրը հավելել է, որ Մելանյա Թրամփը «միշտ հավատարիմ է մնում իրեն», չնայած իր ոճին ուղղված քննադատությանը։

Մելանիա Թրամփը սկանդալային բաճկոնը կրել է 2018 թվականի հունիսին Տեխաս կատարած ուղևորության ժամանակ, որտեղ այցելել է միգրանտ երեխաների համար նախատեսված կալանավայր: Հետևի մասում գրությունը վրդովմունք է առաջացրել, քանի որ շատերը այն անպատշաճ են համարել այցելության համար:

Թրամփը հետագայում բացատրել է, որ ինքը բաճկոնը չի հագել անմիջապես երեխաների հետ հանդիպելու համար, այլ կրել է թռիչքի ժամանակ: Նա ասել է, որ ուղերձը ուղղված է եղել քննադատներին և լրատվամիջոցներին:

«Ես ուզում էի ցույց տալ, որ ինձ համար կարևոր չեն նրանց քննադատությունները: Դա չի խանգարի ինձ անել այն, ինչ ես ճիշտ եմ համարում», — ասել է նա 2018 թվականի հարցազրույցում:

Այս բաճկոնի պատմությունը մնում է ամենաքննարկվող օրինակներից մեկը այն մասին, թե ինչպես կարող է նորաձևությունը դառնալ քաղաքական հայտարարություն: