19 մլն դեպք․ ՌԴ-ում 5․2 անգամ ավելացել է Android սմարթֆոնների վրա հաքերային հարձակումների թիվը

2024-ի առաջին եռամսյակում Ռուսաստանում Android սմարթֆոնների օգտատերերի վրա հարձակումների թիվը նախորդ տարվա նույն ժամանակահատվածի համեմատ աճել է 5․2 անգամ։ Կիբեռանվտանգության փորձագետ Դմիտրի Կալինինի խոսքով՝ նշված ժամանակահատվածում հաքերների զոհ է դարձել ավելի քան 19 միլիոն ռուս օգտատեր։

Ամենավտանգավոր սպառնալիքներից են Dwphon և Mamont վիրուսները։ Dwphon-ն կարող է հավաքել սարքի սեփականատիրոջ անձնական տվյալները, տեղեկություններ հավելվածների մասին և նույնիսկ վնասակար ծրագրեր ներբեռնել առանց օգտատիրոջ համաձայնության:

Mamont-ը կարող է կորզել վճարային տվյալները և հասանելիություն ստանալ վարակված սարքի SMS-ներին, ինչն ավելի քան ակնհայտ ռիսկեր է պարունակում։

Որոշ չարամիտ ծրագրեր, ներառյալ Dwphon-ը, կարող են նախապես տեղադրված լինել սարքերում: Ինչպես նշել է Կալինինը, դա լուրջ վտանգ է ներկայացնում օգտատերերի համար, քանի որ չարագործները կարող են արտադրության սկզբնական փուլերում, առանց արտադրողի կամ այս գործընթացի այլ մասնակիցների իմացության, վնասակար ծրագրեր տեղադրել սարքերում՝ այդպիսով վտանգելով նաև սարքի մատակարարման շղթան։