Քարդաշյանի եւ Ռոնալդուի կողմից սիրված շվեդական լյուքս ապրանքանիշը ներկայացրել է Apple-ի շքեղ հավաքածու, որն արժե 250 հազար դոլար
Եթե դուք Apple-ի արտադրանքի երկրպագու եք, բայց ցանկանում եք, որ ձեր գաջեթներն առանձնանան, Apple-ի՝ թանկարժեք զարդերով ոճավորված այս հավաքածուն կարող է լինել հենց այն, ինչ փնտրում եք: Միակ խնդիրն այն է, որ դրանցից ձեռք բերելու համար դուք պետք է գրպանում ունենաք 250,000 դոլար: Քառորդ միլիոն դոլար արժողությամբ շքեղ հավաքածուն ստեղծվել է շվեդական Golden Concept ընկերության կողմից եւ ներառում է iPhone 15 Pro Max, Apple Watch Ultra 2 եւ այլ մոդելներ՝ պատված ադամանդներով։
Շքեղ ապրանքանիշը պնդում է, որ յուրաքանչյուր հավաքածու ստեղծելու համար հմուտ վարպետներից պահանջվում է ավելի քան 500 ժամ: «Շքեղ ապրանքանիշների շուկայում ինչ-որ արտասովոր բան է պահանջվում: «Միլիարդատերերի գաջեթներ» հավաքածուն հենց այդպիսին է»,-ասում է Golden Concept-ի գործադիր տնօրեն եւ հիմնադիր Պույա Շամսոսսադատին,-«Գինը, անշուշտ, բացառիկ է, բայց արտացոլում է այն տքնաջան աշխատանքն ու նուրբ վարպետությունը, որոնք ներդրվել են այս չորս եզակի ապրանքների ստեղծման համար։ Դրանց արժեքը ժամանակի ընթացքում միայն կբարձրանա»:
Հատուկ iPhone 15 Pro Max-ն առանձնանում է 213 գ․ պլատինե հետնամասով եւ ձեռքով պատրաստված 2448 փայլուն ադամանդներով: AirPods Max-ն ունի պլատինե ականջակալներ՝ 1395 ադամանդներով: Apple Watch Ultra 2-ն ունի 59 գրամանոց պլատինե պատյան՝ 677 ադամանդներով:
Բացի Apple-ի այս արտադրանքներից, հավաքածուն ներառում է նաեւ շվեյցարական Golden Concept ավտոմատ մեխանիզմով ժամացույցը, որը կրկնօրինակում է Apple Watch Series 9-ի դիզայնը, եւ Apple Watch Royal Edition պատյանի ադամանդապատ տարբերակը՝ GC Royal Edition-ից: Ամբողջ հավաքածուն, ընդհանուր առմամբ, պատված է 7586 ադամանդով։
Այս բոլոր ապրանքները տեղադրված են սեւ կաղնուց ձեռագործ տուփի մեջ, որը պատված է սպիտակ կաշվով։ Յուրաքանչյուրը ստեղծված է հաճախորդի պատվերով։
