Էբոլայի թվացյալ բուժումից հետո վարակը կարող է երկար ժամանակ պահպանվել ուղեղում եւ մարմնի այլ մասերում: Նման եզրակացության են եկել ԱՄՆ բանակի վարակիչ հիվանդությունների բժշկական գիտահետազոտական ինստիտուտի գիտնականները։
Science Translational Medicine ամսագրում հրապարակված հոդվածում ասվում է, որ կապիկների վրա կատարված հետազոտությունները ցույց են տվել, որ վիրուսն ակտիվ է մնում եւ ի վիճակի է նորից մահացու եւ վարակիչ հիվանդություն առաջացնել:
Էբոլա վիրուսի՝ մշտական վարակ առաջացնելու ունակության մասին վաղուց է հայտնի, եւ դրա հետ են կապված հեմոռագիկ տենդի որոշ բռնկումներ Աֆրիկայում: Սակայն գիտնականները մարդու օրգանիզմում պաթոգեն նյութի ճշգրիտ գտնվելու վայրի մասին մինչ այսօր չգիտեին: Հայտնի է, որ վիրուսը կարող է թաքնվել նույնիսկ մոնոկլոնալ հակամարմիններով բուժումից հետո, որը ստանդարտ թերապիա է, որն օգտագործվում է Էբոլայով վարակման դեպքում:
Նոր աշխատանքում գիտնականները կապիկի մոդել են օգտագործել, որն առավել ճշգրիտ կերպով վերարտադրում է վարակի ընթացքը մարդկանց մոտ: Պարզվել է, որ ռեզուս կապիկների մոտ 20 տոկոսը, որոնք փրկվել են Էբոլա վիրուսով նախնական վարակից եւ մոնոկլոնալ հակամարմիններով բուժվելուց հետո, մշտական վարակ են ունեցել. հարուցիչը հայտնաբերվել է ուղեղի փորոքային համակարգում, որտեղ շրջանառվում է ողնուղեղային հեղուկը։ Վիրուսը պահպանվել է փորոքներում պարունակվող մակրոֆագների ներսում, այդ թվում՝ քորոիդային պլեքսուսի՝ ծանր բորբոքում եւ բջիջների մահ առաջացնելով:
Երկու կապիկների մոտ գիտնականները հեմոռագիկ տենդի կրկնություն են նկատել՝ ծանր կլինիկական ախտանիշներով, որն ավարտվել է կենդանիների մահով։ Հետաքրքիր է, որ ուղեղից բացի, վարակը չի տարածվել այլ օրգանների վրա։
Հետազոտության մամուլի հաղորդագրությունում ասվում է, որ նմանատիպ դեպքեր են նկատվել նաեւ մարդկանց մոտ։ Այդպես, բրիտանացի բուժքրոջ մոտ Էբոլայից ապաքինվելուց 9 ամիս անց մենինգոէնցեֆալիտ է զարգացրել, իսկ մեկ այլ հիվանդ, ով բուժվում էր մոնոկլոնալ հակամարմիններով, մահացել է ռեցիդիվից 6 ամիս անց՝ հասցնելով վարակել այլ մարդկանց:
Գիտնականների կարծիքով՝ այս ամենը վկայում է հիվանդների երկար ժամանակ հետեւելու անհրաժեշտության մասին, նույնիսկ եթե թվում է, թե նրանք արդեն ապաքինվել են հեմոռագիկ տենդից։
