Տեխասի պետական համալսարանի գիտնականները պարզել են, որ ցերեկվա քունը բարելավում է ուղեղի՝ խնդիրները լուծելու ունակությունը, եւ արագ քնի փուլն առանցքային դեր է խաղում այդ գործընթացում: Պարզվել է, որ քնից հետո մարդիկ ավելի լավ են հաղթահարում խնդիրները, որոնք նախկինում իրենց անլուծելի էին թվում։ Աշխատանքը հրապարակվել է Journal of Sleep Research (JSR) ամսագրում:
Փորձի ընթացքում 58 հոգի նախ լուծել է խնդիրներ՝ ստանալով դրանց համար պատրաստի լուծումներ, ապա բախվել է նմանատիպ խնդիրների, բայց առանց հուշումների։ Դրանից հետո մասնակիցների կեսը ցերեկը 110 րոպե քնել է, իսկ մնացածն արթուն են մնացել։ Երբ բոլորը վերադարձել են խնդիրների լուծմանը, պարզվել է, որ նրանք, ովքեր քնել էին, ավելի լավ են կատարել այնառաջադրանքները, որոնք նախկինում նրանց համար դժվարություն էին ներկայացնում:
Էֆեկտը հատկապես նկատելի է եղել նրանց մոտ, ովքեր ավելի շատ ժամանակ են անցկացրել արագ քնի փուլում։ Հետազոտողները կարծում են, որ այս վիճակում ուղեղն ավելի ակտիվորեն է կապում նոր փորձն առկա գիտելիքների հետ, ինչն օգնում է հետագայում ավելի լավ հաղթահարել նմանատիպ առաջադրանքները։ Թեեւ ուղիղ պատճառահետեւանքային կապը դեռ պետք է հաստատվի, հետազոտության արդյունքները ներգրվում են ավելի մեծ գիտական պատկերի մասին տվյալներում, որ քունը բարելավում է ստեղծագործ մտածողությունը եւ մտավոր ճկունությունը: Այնպես որ, «խնդրի հետ քնելու» խորհուրդը կարող է իսկապես օգտակար ռազմավարություն լինել լուծումներ գտնելու համար: