Տիեզերական օդերևութաբանները հրապարակել են այս շաբաթվա կանխատեսումը՝ նախազգուշացնելով հնարավոր գեոմագնիսական փոթորկի մասին, որն առաջանում է արևի վրա պոռթկման ժամանակ պլազմայի արտանետման հետևանքով: Սա կարող է ազդել Երկրի մակերևույթին ռադիոկապի վրա և նպաստել հյուսիսափայլի առաջացմանը։
Համաձայն Կոլորադոյի Բոուլդեր քաղաքում NOAA-ի Տիեզերական եղանակի կանխատեսման կենտրոնի տվյալների՝ հասարակությունն անհանգստանալու պատճառ չունի: Հիմնականում արևային փոթորիկները կարող են խաթարել բարձր հաճախականության ռադիոկապը, ինչպիսիք են օդանավերի և հեռավոր աշտարակների միջև հաղորդակցությունը:
Կենտրոնի աշխատողներից Ջոնաթան Լաշը նշել է, որ առևտրային թռիչքներ իրականացնող շատ ինքնաթիռներ կարող են օգտագործել արբանյակային կապը որպես պահեստային տարբերակ: «Բարձր լայնություններում, պարզ երկնքի պայմաններում լայն հանրության համար սա հիանալի հնարավորություն կլինի տեսնելու հյուսիսափայլը»,- ասել է Լաշը։
Խնդիրներ կարող են ունենալ նաև արբանյակների օպերատորները իրենց տիեզերանավերին հետևելու հարցում։
Նշենք, որ յուրաքանչյուր 11 տարին մեկ Արեգակի մագնիսական դաշտը փոխվում է․ նրա հյուսիսային և հարավային բևեռները փոխում են տեղերը։ Այս ցիկլի ընթացքում արեգակնային ակտիվությունը նույնպես փոխվում է և այժմ մոտենում է իր գագաթնակետին, որը կոչվում է արևային առավելագույն։
Ըստ Ջոնաթան Լաշի՝ արեգակնային առավելագույնի ժամանակ գեոմագնիսական փոթորիկներ, ինչպիսին էր անցյալ կիրակի նկատվածը, Երկրի վրա կարող են տեղի ունենալ տարին մի քանի անգամ: Իսկ արեգակնային ակտիվության նվազագույն փուլի ժամանակ փոթորիկների միջև միջակայքը կարող է լինել մի քանի տարի: