Այս տարվա հունվարին վիրահատվեց առաջին անդամալույծ կամավորը, որի գլխուղեղում տեղադրվեց Իլոն Մասկին պատկանող Neuralink ընկերության իմպլանտը, ինչի շնորհիվ նա սովորեց կառավարել նոութբուքի կուրսորը բառացիորեն մտքի ուժով։ Ընկերությունն այժմ հրապարակել է տեսանյութ, որում ցուցադրվում են ֆիզիկական նոր հնարավորությունները, որոնք կամավոր բուժառուն ձեռք է բերել այդ վիրահատությունից հետո: Նա արդեն տեսախաղեր և շախմատ է խաղում համակարգչով։
X սոցանցում հրապարակված տեսանյութում ընկերության ներկայացուցիչը ներկայացրել է 29-ամյա Նոլանդ Արբոյին, որը ողնուղեղի վնասվածք է ստացել և արդեն ութ տարի չի կարողանում օգտագործել բոլոր չորս վերջույթները։ Ինչպես բացատրել է ինքը՝ բուժառուն, որը նստած է հատուկ աթոռի վրա, չի կարող շարժել ձեռքերն ու ոտքերը, ինչպես նաև ոչինչ չի զգում ուսից ներքև։
Նա ասել է, որ շատ հեշտ է տարել իմպլանտի տեղադրման վիրահատությանը և հենց հաջորդ օրը դուրս է գրվել հիվանդանոցից։ Սարքավորումների կարգավորումից և որոշ մարզումներից հետո նա սովորել է մտքի ուժով կառավարել նոութբուքի էկրանի կուրսորը։ Ավելի ուշ նա արդեն սկսել է Civilization VI տեսախաղը և շախմատ խաղալ համակարգչով։
Այդուհանդերձ, Նոլանդ Արբոն շատ երկար չի կարող խաղալ, քանի որ իմպլանտի լիցքը բավարար է մի քանի ժամ շարունակական աշխատանքի համար, այնուհետ անհրաժեշտ է լիցքավորել: Իմպլանտն անլար է լիցքավորվում՝ հատուկ բարձր միջոցով։ Ենթադրվում է, որ սերիական տարբերակի դեպքում իմպլանտը կլիցքավորվի, երբ հիվանդը քնած կլինի։
Neuralink-ի իմպլանտով առաջին բուժառուն խոստովանել է, որ ընկերության տեխնոլոգիան զերծ չէ թերություններից, սակայն նա համոզված է, որ սա դեռ սկիզբն է միայն և նույնիսկ այս թերություններով հանդերձ իմպլանտը մեծապես փոխել է իր կյանքը:
CNBC-ի հետ զրույցում փորձագետները բացատրել են, որ նեյրոնային ինտերֆեյսների այլ մշակողները նման արդյունքների են հասել Neuralink-ից շատ առաջ, սակայն այս ընկերության գործունեությունը գիտական հրապարակումների առումով դեռևս չափազանց ցածր է:
Դեռ ամիսներ հարկավոր կլինեն, նախքան ԱՄՆ կարգավորիչները Neuralink-ին թույլ կտան այլ կամավորների գլխուղեղում ևս տեղադրել իրենց իմպլանտը, իսկ ավելի ուշ՝ սկսել դրանց զանգվածային արտադրությունն ու տեղադրումը: Ընկերությունը հույս ունի ապագայում սովորել, թե ինչպես իր իմպլանտների օգնությամբ վերականգնել տեսողությունը։