Վենետիկի բիենալեն այս տարի տեղի կունենա ապրիլին։ Արդեն 60-րդ անգամ անցկացվող այս տարվա միջոցառումը մի շարք պատճառներով կարող է լինել մինչ օրս ամենահիշարժաններից մեկը:
Մի կողմից, ուշադրության կենտրոնում կլինեն բնիկ ժողովուրդներին ներկայացնող նկարիչները, որոնք կներկայացնեն հիմնական տաղավարները՝ Ջեֆրի Գիբսոնից (ԱՄՆ) և Գլիսերիա Տուպինամբայից (Բրազիլիա) մինչև Էդի Մարտինես Սան Մարինոյից, հայտնում է Hypebeast-ը։
Մյուս կողմից, գրաքննության վերաբերյալ մտահոգությունները շարունակում են աճել ինչպես բիենալեի, այնպես էլ ընդհանրապես արվեստի աշխարհում, երբ պաղեստինամետ արվեստագետներն ու թանգարանները գրաքննության են ենթարկվում Իսրայելի և ՀԱՄԱՍ-ի միջև շարունակվող պատերազմի պայմաններում Պաղեստինին աջակցելու համար:
Բիենալեի կազմակերպիչներից Ադրիանո Պեդրոսան հրապարակել է 331 արվեստագետների ցուցակը, որոնք այս տարվա գարնանը կներկայացնեն ցուցահանդես: «Stranieri Ovunque — օտարերկրացիներն ամենուր» խորագրով այս տարվա բիենալեում ներկայացված արվեստագետների թիվը ավելի քան 100-ով գերազանցում է 2022 թվականի ցուցանիշը։
«Այս համատեքստում «օտարերկրացիներն ամենուր» արտահայտությունը մի քանի իմաստ ունի», — ասել է Պեդրոսան համաժողովի ժամանակ: «Նախ, ուր էլ գնաս, որտեղ էլ որ լինես, միշտ օտարերկրացիների հետ ես հանդիպելու։ Նրանք՝ մենք, ամենուր ենք։ Երկրորդ, անկախ նրանից, թե որտեղ եք գտնվում, դուք միշտ իսկապես և խորքում օտար եք: … Այնուամենայնիվ, այս արտահայտությունը կարող է դիտվել նաև որպես կարգախոս, գործողության կոչ, հուզմունքի, ուրախության կամ վախի ճիչ. «Օտարներն ամենուր են»:
Վենետիկի բիենալեն կմեկնարկի ապրիլի 20-ին և կշարունակվի մինչև 2024 թվականի նոյեմբերի 24-ը։