Քաղցկեղներով հիվանդացության աճին առաջին հերթին նպաստում է կյանքի տեւողության աճը. ինչքան երկար է ապրում մարդը, այնքան մեծանում է հավանականությունը, որ նրա մոտ ծեր տարիքում քաղցկեղ կլինի: Այս մասին լրագրողների հետ զրույցում ասաց ՀՀ ԱՆ Վ.Ա. Ֆանարջյանի անվան Ուռուցքաբանության ազգային կենտրոնի տնօրեն Նարեկ Մանուկյանը:
Նրա խոսքով, ախտորոշման նոր մեթոդների ի հայտ գալը նպաստում է քաղցկեղային հիվանդությունների հայտնաբերելիության աճին, ինչը եւս ազդում է վիճակագրության վրա:
Իր հերթին էնդոսկոպիստ Վլադիմիր Նահապետյանը նշեց, որ մի շարք ռիսկի գործոններ կարող են ազդել հաստ աղու քաղցկեղի զարգացման հավանականության վրա:
Մասնավորապես, մեծ դեր են խաղում ժառանգական նախատրամադրվածությունը, ինչպես նաեւ վնասակար սովորությունները. ալկոհոլը եւ ծխախոտը մեծացնում են հաստ աղու քաղցկեղի զարգացման ռիսկը: Կարմիր մսի մեծ քանակը սննդակարգի մեջ եւս մեծացնում է այս հիվանդության ի հայտ գալու հավանականությունը:
Նշենք, որ իր տարածվածությամբ այս ամբողջ աշխարհում հաստ աղու քաղցկեղը բոլոր քաղցկեղների մեջ երրորդ տեղն է զբաղեցնում: Ամեն տարի աշխարհում այս հիվանդության 1 մլն նոր դեպք է հայտնաբերվում եւ մոտ 500 000 մահ: Ավելի հաճախ այս հիվանդությունը հանդիպում է տղամարդկանց մոտ:
Հաստ աղու քաղցկեղի դեպքում 5-ամյա ապրելիությունը 64 տոկոս է, իսկ վաղ հայտնաբերման դեպքում՝ 90 տոկոս: