Ցավ եմ ապրում՝ տեսնելով, թե օր օրի ինչքան վարակման ու մահվան դեպքեր են գրանցվում: Այն, ինչ այսօր տեղի է ունենում աշխարհում, եւս մեկ անգամ մեզ սովորեցնում է սիրել ու ճիշտ գնահատել մեր կյանքը:
Այս մասին NEWS.am Sport-ի թղթակցի հետ զրույցում ասաց հունահռոմեական ըմբշամարտի երիտասարդների աշխարհի ու Եվրոպայի չեմպիոն, Հայաստանի չեմպիոն, 72 կգ քաշային Մալխաս Ամոյանը:
Ինչպես Հայաստանի բոլոր մարզիկները, երիտասարդ Ամոյանը նույնպես այս շրջանում մարզվում է տան պայմաններում կամ բացօթյա: 72 կգ քաշային կարգում Հայաստանի չեմպիոնը երիտասարդների կազմում արդեն հասցրել է նվաճել բոլոր մեդալները:
Ըմբիշը նախապատրաստվում է կարանտինի ավարտից հետո մեծ ուժով մեծահասակների կազմում պայքարի մեջ մտնելուն եւ բարձր արդյունքներ գրանցելուն, ինչպես դա արել է իր հորեղբայրը՝ 2008 թվականի Պեկինի Օլիմպիական խաղերի բրոնզե մեդալակիր, աշխարհի փոխչեմպիոն, Եվրոպայի կրկնակի չեմպիոն Ռոման Ամոյանը:
Մալխաս, ինչպե՞ս ես անցկացնում օրերդ: Ինչպե՞ս ես կազմակերպում մարզումներդ:
Շատ լավ եմ անցկացնում կարանտինի օրերը: Մեծ մասը ընտանիքիս անդամների հետ եմ, մարզումների եմ գնում եւ դասերի մասնակցում: Սովորում եմ Երեւանի պետական համալսարանի միջազգային հարաբերություններ բաժնի երկրորդ կուրսում. հեռակայում եմ: Զուգահեռ սովորում եմ նաեւ Ֆիզիկական կուլտուրայի եւ սպորտի հայկական պետական ինստիտուտի ըմբշամարտի բաժնի առաջին կուրսում:
Մարզումներս կազմակերպում եմ տարբեր տեղերում՝ տանը, դրսում:
Ի՞նչ դժվարությունների ես հանդիպում այս օրերին: Հետեւո՞ւմ ես #մնատանը հորդորին:
Դժվարությունն այն է, որ չեմ կարողանում լիարժեք մարզվել: Բավարարվում ենք տնային ու բացօթյա մարզումներով՝ փորձելով պահպանել մարզավիճակ ֆիզիկական աշխատանքներով: Դժվարությունը նաեւ այն է, որ չենք կարողանում ընկերներով հաճախ հանդիպել, Երեւանի փողոցներում զբոսնել, քանի որ հետեւում եմ #մնատանը հորդորին եւ խուսափում մարդաշատ վայրերում հայտնվելուց:
Ինչպե՞ս կնկարագրես աշխարհում ստեղծված այս իրավիճակը:
Իհարկե, աշխարհում տիրող այս իրավիճակը շատ ցավալի է ինձ համար այնպես, ինչպես բոլորի համար: Միայն մի բան գիտեմ, որ այս ամենը եւս մեկ անգամ մեզ սովորեցնում է սիրել ու ճիշտ գնահատել մեր կյանքը:
Վախ ունե՞ս այս իրավիճակի հետ պայմանավորված:
Ոչ թե վախենում եմ, այլ ցավ եմ ապրում՝ տեսնելով, թե օր օրի ինչքան են ավելանում վարակման ու մահվան դեպքերը:
Ինչո՞վ ես լցնում ազատ ժամանակդ տանը:
Ազատ ժամանակս հիմնականում անցկացնում եմ ընտանիքիս անդամների հետ, ֆիլմեր եմ դիտում, դասերով եմ զբաղվում:
Ի՞նչ ֆիլմ խորհուրդ կտաս դիտել տանը այս օրերին:
Ռեժիսոր Ջորջ Թիլլման կրտսերի «Զինվորական ջրասուզորդը» ֆիլմը (2000թ.):
Իրական փաստերի վրա նկարահանված ֆիլմ է՝ լեգենդար ջրասուզորդ Կառլ Բրաշիրի կյանքից:
Գի՞րք…
Սերվանտեսի «Դոն Կիխոտ»:
#ՄնաՏանը…
Մնանք տանը եւ յուրաքանչյուրս մտածենք մեր հարազատների, ժողովրդի մասին, փորձենք հնարավորինս տանը մնալով՝ զերծ պահել մեզ վարակից:
Շնորհակալություն…
Ուզում եմ հատուկ շնորհակալություն հայտնել բուժաշխատողներին: Նրանք, իրենց կյանքը վտանգելով, օգնում են հարյուրավոր մարդկանց: