Սուրեն Շահվերդյանը հրաժարական է տալիս՝ «չհանդուրժելով թատրոնի քայքայումը»

«Ողջ կյանքս ապրել ու աշխատել եմ թատրոնում և թատրոնի համար։ Ինձ համար ցավ է տեսնել թատրոնի կաթվածահար վիճակը։ Այսպես շարունակվել չի կարող»,- ֆեյսբուքյան իր էջում գրել է Համազգային թատրոնի գեղարվեստական ղեկավար Սուրեն Շահվերդյանը՝ անդրադառնալով թատրոնում շարունակվող գործադուլին եւ դրա հետեւանքներին․

«Ես չեմ հանդուրժի թատրոնի քայքայումը։ Տեսնում եմ, որ իմ ներկայությունն ավելի է բարդացնում իրավիճակը, թեև ես իմ ձեռքն էի մեկնել ձեզ՝ համոզված լինելով, որ կարող եմ օգնել և օգտակար լինել, բայց ստացվեց հակառակը… Այժմ որոշում եմ կայացրել հրաժարվել գեղարվեստական ղեկավարի պաշտոնից։ Ինչպես որ խոստացել էի, ես մնում եմ ձեր բարեկամը, գրկում եմ ձեզ մեկ առ մեկ ու հաջողություն մաղթում ձեր գործում։ Հուսով եմ, որ մեր միջև անախորժությունները կմոռացվեն, կներվեն միմյանց հասցված վիրավորանքները։ Հուսով եմ նաև, որ ապագայում առիթներ կունենանք միասին ստեղծագործելու և ծառայելու Նորին մեծություն Թատրոնին»,- ասված է նրա գրառման մեջ։

Հիշեցնենք՝ Վիգեն Չալդրանյանը, որ  Համազգային թատրոնում համատեղում էր գեղարվեստական ղեկավարի և տնօրենի պաշտոնները, հրաժարվել է առաջինից և գեղարվեստական ղեկավար նշանակել Սուրեն Շահվերդյանին․ թատրոնի դերասանները պահանջում են Չալդրանյանի հրաժարականը նաև տնօրենի պաշտոնից եւ կամայական են համարում Սուրեն Շահվերդյանի նշանակումը։