Երևանի քաղաքապետարանի նախաձեռնությամբ առաջին անգամ անցկացվել է «Ածխաջրածնային փոխանակության խանգարմամբ և սրտանոթային շատ բարձր ռիսկով պացիենտների վարման արդյունավետության գնահատում» սքրինինգային ծրագիրը: Ծրագրի նպատակը հիվանդությունների վաղ հայտնաբերումն ու կանխարգելումն է:
Մեկ տարի տևողությամբ ծրագրի շրջանակում իրականացված ուսումնասիրություններին մասնակցել է ավելի քան 2000 քաղաքացի: Ավելորդ քաշ, զարկերակային բարձր ճնշում և շաքարային դիաբետ ունեցող 200 հոգի անվճար անցել է լաբորատոր խորացված և ոչ մատչելի հետազոտություններ: Շահառուներին տրամադրվել են նաև զարկերակային ճնշման և գլյուկոզայի չափման հատուկ սարքավորումներ, որոնց առցանց կապի միջոցով համապատասխան տվյալները ավտոմատ փոխանցվում են բժիշկներին: Փաստացի, քաղաքացիները գտնվում են մասնագետների շուրջօրյա հեռահար հսկողության տակ:
Ծրագրի նախնական արդյունքների ամփոփիչ միջոցառման ընթացքում ներկայացվել են համաբուժարաններում մինչ օրս կատարված ուսումնասիրություններն ու արձանագրված ցուցանիշները:
Նախաձեռնությունն իրականացվել է Երևանի քաղաքային էնդոկրին դիսպանսերի և Հայաստանի սրտաբանական ասոցիացիայի հետ համատեղ:
«Ծրագիրն իրականացվում է քաղաքապետարանի միջոցներով և ընդգրկում է մի քանի փուլ: Շատ կարևոր է, որ մեր համաքաղաքացիները տարվա մեջ գոնե մեկ անգամ այցելեն քաղաքապետարանի ենթակայության ամբուլատոր-պոլիկլինիկական հաստատություններ և անցնեն կանխարգելիչ անհրաժեշտ հետազոտություններ: Կոչ ենք անում նաև՝ վարել առողջ ապրելակերպ»,-նշել է Երևանի քաղաքապետարանի առողջապահության վարչության պետ Կամսար Բաբինյանը:
Երևանի գլխավոր սրտաբան, Հայաստանի սրտաբանների ասոցիացիայի նախագահ Պարունակ Զելվեյանը, կարևորելով ծրագրի իրականացումը, ընդգծել է սրտանոթային հիվանդությունների տարածվածությունը:
«Ուսումնասիրությունները թույլ կտան ունենալ վիճակագրական առավել հստակ տվյալներ: Իսկ ծրագրի ավարտին երկու հիմնախնդիրների ՝ զարկերակային ճնշման և դիաբետի հսկողության ու բուժման արդյունավետության բարձրացման վերաբերյալ կներկայացվեն նոր ուղիների ներդրման առաջարկություններ: Երևանի համար սա աննախադեպ գիտական նախագիծ է, որը, վստահ եմ, իր դրական արդյունքները կտա»,— նշել է Պարունակ Զելվեյանը:
Քաղաքային էնդոկրին դիսպանսերի տնօրեն Անուշ Բունիաթյանն իր հերթին նկատել է, որ ծրագիրը նաև կարևոր սոցիալական նշանակություն ունի:
Կազմակերիչները նշում են, որ հետագայում կքննարկվի նաև ծրագրի շարունակականության հնարավորությունը
ԵՐԵՎԱՆԻ ՔԱՂԱՔԱՊԵՏԱՐԱՆ