Ֆրանսիայի չեմպիոն Փարիզի ՊՍԺ-ի գլխավոր մարզիչ Մաուրիսիո Պոչետինոն Չեմպիոնների լիգայի 1/8 եզրափակիչի առաջին խաղում կատալոնական «Բարսելոնայի» նկատմամբ 4:1 հաշվով արտագնա հաղթանակից հետո անդրադարձել է ֆրանսիացի հարձակվող Կիլիան Մբապեին, որը դարձել էր հեթ-տրիկի հեղինակ:
««Բարսելոնայի» դեմ խաղից առաջ վերջին մարզման ժամանակ Մբապեն ինձ հարցրեց, թե քանի անգամ եմ հաղթել «Նոու Կամպում»: Ես պատասխանեցի՝ մեկ անգամ: Նա ասաց, որ վաղը մենք կհաղթենք երկրորդ անգամ: Կասկած չկա, որ Մբապեն լավագույններից մեկն է աշխարհում՝ չնայած իր տարիքին: Նա անհավանական բաներ է անում, սակայն մենք պետք է չկորցնենք իրականության զգացումը»,- արգենտինացի մասնագետի խոսքը մեջբերում է ՈւԵՖԱ-ի մամուլի ծառայությունը:
Հիշեցնենք, որ ՊՍԺ-ն դարձավ առաջին ֆրանսիական ակումբը, որը Չեմպիոնների լիգայի խաղում «Բարսելոնային» հաղթեց «Նոու Կամպ» ստադիոնում: Պատասխան հանդիպումը Փարիզում տեղի կունենա մարտի 10-ին։
