Քիմ Քարդաշյանը բացահայտ խոսել է Քանյե Ուեսթի հետ իր «թունավոր» ամուսնության մասին. «Մինչև հիմա դժվար է հարաբերություններ կառուցել»

Վաղուց ի վեր առաջին անգամ Քիմ Քարդաշյանը անկեղծորեն խոսել է Քանյե Ուեսթի հետ իր ամուսնությունից հետո տեղի ունեցածի մասին՝ այն անվանելով «թունավոր» և խոստովանելով, որ դեռևս դժվարություններ է ունենում անձնական կյանքում և երեխաների դաստիարակության հարցում։

Ռեալիթի շոուի 44–ամյա աստղը Ալեքս Քուփերի հետ մասնակցել է «Call Her Daddy» փոդքասթին, որտեղ մանրամասն պատմել է իր ինը տարվա ամուսնության մասին 48-ամյա ռեփերի հետ։

Քիմի խոսքով՝ իրենց հարաբերությունների սկզբում իրեն գրավել է Քանյեի ինտելեկտը և նրա երևակայական բնույթը. «Նա թվում էր կյանքից մեծ։ Մենք միասին շատ լավ ժամանակ ենք անցկացրել», — հիշում է Քարդաշյանը։

Այնուամենայնիվ, շուտով ամեն ինչ փոխվեց։ Ուեսթը, որը հրապարակավ խոսել է իր հոգեկան առողջության խնդիրների մասին, ագրեսիվ է դարձել Քիմի և նրա ընտանիքի նկատմամբ։ «Երբ մեկը առաջին անգամ նյարդային խանգարում է ունենում, դու ուզում ես լինել նրա կողքին, աջակցել նրան», — ասում է նա։ «Բայց եթե նա պատրաստ չէ փոխվել՝ նույնիսկ իր առողջության և ընտանիքի համար, հարաբերությունները դառնում են թունավոր», — խոստովանել է Քիմը։

Քարդաշյանը շեշտել է, որ երբեք չի խանգարել Քանյեին տեսնել իր երեխաներին՝ Նորթին (12), Սեյնթին (9), Չիկագոյին (7) և Փսալմին (5), սակայն, ըստ նրա, ռեփերը մի քանի ամիս է, ինչ կապ չի հաստատել նրանց հետ։

«Նա կարող է զանգահարել ցանկացած ժամանակ, բայց մենք մի քանի ամիս է, ինչ նրանից լուր չենք ստացել։ Երեխաները առողջ են, երջանիկ և ապրում են իրենց սովորական կյանքով։ Ես պարզապես փորձում եմ նրանց կայուն պահել», — ասել է նա։

Քարդաշյանը խոստովանել է, որ երկար ժամանակ մնացել է ամուսնության մեջ՝ հույս ունենալով, որ Ուեսթի «վիճակը կլավանա»։ «Երբ երեխաներ ունես, ավելի դժվար է հեռանալ։ Ես իսկապես հավատում էի, որ ամեն ինչ կկարգավորվի։ Բայց մի պահ հասկացա, որ պետք է փրկեմ ինձ՝ նրանց համար լավագույն մայրը լինելու համար»։

Նա ասաց, որ սկանդալների ֆոնին սկսել է կորցնել իր անվտանգության զգացումը՝ թե՛ հուզական, թե՛ ֆինանսական։ «Երբեմն մենք հինգ Lamborghini էինք ունենում, և ես տուն էի գալիս, և դրանք այլևս չէին լինում։ Պարզվում էր, որ նա պարզապես դրանք ընկերներին էր տվել ճգնաժամի ժամանակ։ Հետո նա ևս հինգը գնում էր, և նույն բանը պատահում էր։ Ես երբեք չգիտեի, թե ինչ սպասել առավոտյան»։

Քիմին հատկապես ծանր հարված հասցրին Քանյեի հրապարակային պոռթկումները սոցիալական ցանցերում, երբ նա վիրավորեց նրա ընտանիքին, այդ թվում մորը՝ Քրիս Ջեններին՝ նրան անվանելով «Քրիս Ջունգ Ըն»։ «Ինձ համար անտանելի էր տեսնել, թե ինչպես է իմ ընտանիքը տառապում», — հիշում է նա։ «Ես հաճախ պարզապես լռում էի՝ փորձելով հասկանալ, թե ինչ է կատարվում»։

Այնուամենայնիվ, աստղը շնորհակալություն է հայտնել իր սիրելիներին աջակցության և իրեն չճնշելու համար։

«Նրանք հասկանում էին, որ ես ունեմ սեր, հարգանք և չորս երեխա։ Ես ամեն ինչ արեցի, որ այս ամուսնությունը հաջող լինի»։

2021 թվականին ամուսնալուծությունից հետո Քանյեն բազմիցս մեղադրել է Քիմին, թե իբր վերջինս թույլ չի տալիս տեսնել իր երեխաներին, նույնիսկ պնդելով, որ նա «առևանգել է» նրանց։ «Սա առևանգում չէ, սա ամուսնալուծություն է», — ընդգծել է Քիմը։ «Երեխաները ապրում են ինձ հետ, ես եմ նրանց մեծացնում, բայց միշտ առողջ հարաբերություններ եմ պահպանում նրանց հոր հետ։ Ես նրանց պաշտպանում եմ միայն անհրաժեշտության դեպքում»։

Ամուսնալուծությունից հետո Քիմը հանդիպում էր դերասան Փիթ Դևիդսոնի և ֆուտբոլիստ Օդել Բեքհեմ կրտսերի հետ։ Սակայն նույնիսկ այս հարաբերությունները բարդանում էին Ուեսթի վարքագծով։

«Կային ժամանակներ, երբ ինչ-որ մեկը սկսում էր հեռու մնալ՝ ասելով. «Ես չեմ ուզում գործ ունենալ քո նախկինի հետ, այն դեպքում, եթե նա նորից սկսի հաղորդագրություններ գրել»։ Դա վիրավորական է։ Բայց ես հավատում եմ, որ իմ տղամարդը չի վախենա դրանից»։

Քիմը նաև հիշել է Քանյեի Eazy տեսանյութը, որտեղ նա «թաղում է» Փիթ Դևիդսոնի կավից պատրաստված տարբերակը։ «Ես շատ տխուր էի։ Դա անարդար էր Փիթի նկատմամբ։ Նա հրաշալի մարդ է, և ես ցավում էի, որ նա ստիպված էր անցնել դրա միջով»։

Այժմ Քիմը երկար տարիներ անց առաջին անգամ միայնակ է և խոստովանում է, որ խաղաղություն է զգում.

«Ես երջանիկ եմ միայնակ լինելով։ Ես ունեմ չորս երեխա, կարիերա և կյանք, որը պահանջում է իմ ուշադրությունը։ Այս պահին ես նոր հարաբերություններ չեմ փնտրում, ես պարզապես ապրում և վայելում եմ այս ժամանակը»։

Աստղը բացահայտել է, որ իր ավագ դուստրը՝ Նորթը, հաճախ է մորը դրդում նոր հարաբերություններ գտնել։ «Վերջերս նա ասաց. «Մայրիկ, քեզ ընկեր է պետք։ Դու պետք է նորից ամուսնանաս։ Դու շատ ես ծերանում, և ոչ ոք չի ցանկանա դրա հետ գործ ունենալ»։ Ես պարզապես մտածում էի. «Ի՞նչ», — ծիծաղում է Քիմը։ «Նա ինձ դա անընդհատ ասում է»։

Չնայած դժվարություններին և աղմկահարույց ամուսնալուծությանը՝ Քարդաշյանը պնդում է, որ չի զղջում Ուեսթի հետ անցկացրած ժամանակի համար։ «Տասը տարուց ավելի հարաբերությունները և չորս գեղեցիկ երեխաները ձախողում չեն», — ընդգծել է նա։