Իսպանիայի չեմպիոն եւ Չեմպիոնների լիգայի գավաթակիր Մադրիդի «Ռեալի» իտալացի գլխավոր մարզիչ Կառլո Անչելոտին գովել է իր ղեկավարած թիմի ֆրանսիացի հարձակվող Կիլիան Մբապեին։ Իսպանիայի առաջնության 20-րդ տուրում Արքայական թիմը տանը 4:1 հաշվով կամային հաղթանակ է տարել «Լաս Պալմասի» նկատմամբ, Մբապեն դարձել է դուբլի հեղինակ։
«Մբապեն մեզ շատ օգնեց՝ ցուցադրելով շատ որակյալ խաղ։ Թիմը շատ լավ է աշխատում։ Մբապեի խաղային դիրքը հստակ է։ Նա լավագույն կենտրոնական հարձակվողն է աշխարհում։ Կարող էինք նրան ձախ թեւում օգտագործել, բայց նա գերազանց հարձակվող է եւ իրեն շատ լավ է զգում կենտրոնում։
Նա արագացումներով հարվածային դիրք դուրս գալու բացառիկ որակ ունի եւ դրանից կարողանում է առավել արդյունավետ օգտվել, երբ խաղում է կենտրոնին մոտ»,- Անչելոտիի խոսքը մեջբերում է «Ռեալի» կայքը։
Մադրիդում առաջին մրցաշրջանն անցկացնող Մբապեն 29 խաղում խփել է 17 գոլ, կատարել 3 գոլային փոխանցում։
