«Բարսելոնայի» լեհ հարձակվող Ռոբերտ Լեւանդովսկին մեկնաբանել է Մադրիդի «Աթլետիկոյից» կրած 1:2 հաշվով պարտությունը Իսպանիայի առաջնության 18-րդ տուրի տնային խաղում։ Երկրորդ գոլը կատալոնական թիմը բաց էր թողել ավելացված 6-րդ րոպեին։
«Կարծում եմ՝ մեր խաղացողները շատ են տխրել, քանի որ լավ անցկացրինք առաջին խաղակեսը։ Երկրորդ խաղակեսում էլ ավելի ուժեղ էինք, բայց մեր սխալների պատճառով «Աթլետիկոն» ստեղծեց պահեր եւ երկու գոլ խփեց։
Մենք լավ ֆուտբոլ ցուցադրեցինք, բայց դա կարեւոր չէ, եթե չես օգտագործում հնարավորությունները։ Կարելի է գեղեցիկ խաղալ, բայց վերջին շտրիխի բացակայությամբ գոլ խփելը բարդ է։ Այդ պատճառով էլ մենք պարտվեցինք»,- Ռոբերտ Լեւանդովսկու խոսքը մեջբերում է Barca Universal-ը։
Ընթացիկ մրցաշրջանում Ռոբերտ Լեւանդովսկին «Բարսելոնայի» հետ մասնակցել է 24 հանդիպման, խփել է 23 գոլ, կատարել 2 գոլային փոխանցում։
