Անցյալ շաբաթ Կենտրոնական Ինդոնեզիայում պիթոնի որովայնում հայտնաբերվել է կնոջ մարմին, որին օձն ամբողջությամբ կուլ է տվել, հայտնում է Ֆրանսպրես գործակալությունը՝ վկայակոչելով տեղի ոստիկանությանը։
Նշվում է, որ սա մեկ ամսվա ընթացքում նահանգում պիթոնի երկրորդ սպանությունն է։
36-ամյա Սիրիաթին երեքշաբթի առավոտյան դուրս է եկել տնից՝ հիվանդ երեխայի համար դեղ գնելու համար, բայց այդպես էլ չի վերադարձել, ինչը հարազատներին ստիպել է սկսել նրա որոնումները:
Նրա 30-ամյա ամուսինը՝ Ադիանսան, կնոջ հողաթափերն ու տաբատը գտել է գետնին ընկած իրենց տնից մոտ 500 մետր հեռավորության վրա՝ Հարավային Սուլավեսի նահանգի Սիտեբա գյուղում։
«Քիչ անց նա արահետից մոտ 10 մետր հեռավորության վրա օձ է նկատել։ Օձը դեռ ողջ էր»,- Ֆրանսպրեսին հայտնել է տեղի ոստիկանապետ Իդուլը:
Գյուղի վարչական ղեկավարությունը Ֆրանսպրեսին հայտնել են, որ Ադիանսայի մեջ կասկած է առաջացել այն բանից հետո, երբ աչքով է ընկել պիթոնի չափազանց ուռած որովայնը:
Նա կանչել է գյուղացիներին՝ օգնելու իրեն բացել պիթոնի ստամոքսը, որտեղ հայտնաբերել են կնոջ մարմինը։
Մահացու հարձակումը տեղի է ունեցել մոտ մեկ ամիս այն բանից հետո, երբ Հարավային Սուլավեսիի մեկ այլ շրջանում մի կնոջ ցանցավոր պիթոնի որովայնում մահացած են գտել:
Նման դեպքերը համարվում են չափազանց հազվադեպ, սակայն վերջին տարիներին պիթոնները մի քանի մարդ են կուլ տվել։ Անցյալ տարի ծայրագավառի բնակիչները սպանել են ութ մետրանոց պիթոնին, որը գյուղերից մեկում խեղդամահ է արել և կուլ տվել ագարակատերերից մեկին: 2022 թվականին Ինդոնեզիայի Ջամբի նահանգում էլ պիթոնը սպանել և ամբողջությամբ կուլ է տվել մի կնոջ։ 2018 թվականին հարավարևելյան Սուլավեսիի Մունա քաղաքում յոթ մետրանոց պիթոնի մեջ 54-ամյա մի կնոջ են մահացած գտել։
