«Նարեկացի» արվեստի միությունում բացվել է «Անհատականություն» խորագրով ցուցահանդեսը, որում ուսուցչուհի Արևիկ Առաքելյանի ղեկավարությամբ ներկայացված են երիտասարդ նկարիչներ Աշոտ Թորոսյանի, Արեգա Թորոսյանի և Էլեն Սիմոնյանի աշխատանքները։ Այս իրադարձությունը գրավել է ինչպես արվեստի սիրահարների, այնպես էլ պրոֆեսիոնալ արվեստագետների ուշադրությունը։ Ցուցահանդեսը դարձավ հիանալի հնարավորություն՝ տեսնելու, թե ինչպես են երիտասարդ տաղանդներն իրենց գաղափարները կյանքի կոչում կտավի վրա:
Ուսուցչուհի Արևիկ Առաքելյանը, ներկայացնելով իր սաների աշխատանքները, նշեց. «Երիտասարդ արվեստագետների մեջ ամենակարևորը ազնվությունն է, ինքնարտահայտումը»։ Եվ իսկապես, ցուցահանդեսում ներկայացված յուրաքանչյուր աշխատանք լի է անկեղծությամբ ու անմիջականությամբ։
Ամենաերիտասարդ ստեղծագործող Արեգաի նկարները հիացնում են իրենց պայծառությամբ և անկեղծությամբ։ Նրա ստեղծագործություններում կարելի է տեսնել ֆանտազիայի և երևակայության աշխարհ, որտեղ համակցված են անսպասելի ձևերն ու գույները, դրանք դիտողին խորասուզում են մանկական անմիջականության և բերկրանքի աշխարհ:
Աշոտ Թորոսյանի ստեղծագործություններն արդեն առանձնանում են ավելի հասուն մոտեցմամբ։ Նրա աշխատանքներում նկատելի են կոմպոզիցիաների խորը մտածվածությունը և լույսի ու ստվերի նուրբ համադրությունը։ Այս նկարներից յուրաքանչյուրում տեսանելի է հետագա մասնագիտական աճի ներուժ:
Մասնագետները նշեցին, որ մասնակիցներն ունեն պատրաստվածության բարձր մակարդակ, իսկ նրանց աշխատանքներն ինքնատիպ են։ «Աշակերտի աշխատանքի որակը կախված է ուսուցչից։ Ամենավատ բանը, որ կարելի է անել, երեխային ստիպելն է, որ պատճենի, հատկապես մեծերին»:
«Անհատականություն» խորագրով ցուցահանդեսը հանդիսատեսի առաջ բացեց երիտասարդների ստեղծած արվեստի բազմաշերտ աշխարհը: Յուրաքանչյուր աշխատանքում երևում է յուրահատուկ ոճ ու ինքնաարտահայտման ցանկություն։ Այս աշխատանքները ցույց են տալիս երիտասարդ արվեստագետների ներուժը:
Ցուցահանդեսի բացման արարողությունն ավարտվեց «Նարեկացի» արվեստի միության հիմնադիր և ղեկավար Նարեկ Հարությունյանի շնորհավորանքներով՝ ուղղված ցուցահանդեսի մասնակիցներից Արեգա Թորոսյանին։ Մյուս երկու մասնակիցները, ցավոք, չէին կարողացել ներկա լինել բացմանը, սակայն ցանկացողները դեռ կկարողանան հանդիպել և շփվել երիտասարդ տաղանդների հետ, քանի որ ցուցահանդեսը բաց է մինչև հուլիսի 5-ը։
Նարեկ Հարությունյանը քննարկեց Արեգայի հետ նրա նկարները՝ իր հիացմունքն արտահայտելով նրա ստեղծագործական մոտեցման և աշխատանքի խորության վերաբերյալ։ Ի նշան նրա տաղանդի գնահատանքի և աջակցության՝ կենտրոնի ղեկավարը նրան նվիրեց հեքիաթների գիրք՝ գունեղ նկարազարդումներով, որպեսզի նա կարողանա դրանցից ոգեշնչում ստանալ իր հետագա աշխատանքների համար։
