Այսպես կոչված «քովիդային ոտքի մատները» կարող են իրականում կապ չունենալ կորոնավիրուսի հետ։ Նման եզրակացության են եկել Կոնեկտիկուտի (ԱՄՆ) Յեյլի համալսարանի փորձագետները։ Նրանց հետազոտության արդյունքները ներկայացրել են PNAS ամսագրում։
Գիտնականներն ուսումնասիրել են կորոնավիրուսային վարակի կասկածանքով 23 մարդու տվյալներ, ինչպես նաեւ «քովիդային ոտքի մատների» գանգատներ։ Սակայն հիվանդությունը հաստատվել է միայն 3 պացիենտի մոտ։ Մասնագետները կարծում են, որ ոտքի մատների հետ կապված խնդիրների իրական պատճառն այն է, որ շատ մարդիկ համավարակի ժամանակ մնացել են տանը չեն կրել գուլպաներ եւ կոշիկներ:
Նախկինում գիտնականները ենթադրում էին, որ մանուշակագույն մատները եւ «կեղծ ցրտահարության» ախտանիշները հայտնվում են վիրուսի դեմ իմունային համակարգի ակտիվ պայքարի պատճառով։
Նոր հետազոտության հեղինակներն ընդգծել են, որ իրենք չեն կարող ամբողջությամբ բացառել SARS-CoV-2-ի նկատմամբ իմունային պատասխանը, սակայն կարծում են, որ «քովիդային մատների» ծագումն ունի որոշ անուղղակի պատճառներ։
