Բրիժիտ Մակրոնը փոխել է իր ոճը՝ տղամարդ լինելու մասին լուրերի ֆոնին

Բրիժիտ Մակրոնը ստիպված էր փոխել իր ոճը և նաև բախվել է առողջական խնդիրների, երբ համացանցում սկսեցին շրջանառվել անհիմն լուրեր, որ Ֆրանսիայի առաջին տիկինը տղամարդ է: Բրիժիտի կրտսեր դուստրը՝ Տիպեն Օզիերը, ցուցմունք է տվել դատարանում՝ կիբերբուլինգի և նախագահի կնոջը զրպարտելու մեջ մեղադրվող տասը կասկածյալների դատավարության ժամանակ:

«Նա գիտի, որ իր կերպարը կարող են աղավաղել», — ասել է Օզիերը: «Այս լուրերի սկսվելուց ի վեր մայրս շատ զգույշ է եղել իր կեցվածքի և հագուստի հարցում: Նա չի կարող անտեսել իր մասին տարածվող սարսափելի բաները»:

Նա ավելացրել է, որ Բրիժիտը «անընդհատ հարձակման տակ է», և իր թոռները արդեն տեղյակ են չարամիտ լուրերի մասին: «Կարևոր էր այսօր գալ և ցույց տալ, թե ինչ վնաս է սա պատճառել: Ես ուզում էի խոսել այն մասին, թե ինչպես է փոխվել նրա կյանքը այս ատելությունից հետո», — ընդգծել է Տիպենը:

Մի քանի տարի շարունակ համացանցում լուրեր էին շրջանառվում, որոնց համաձայն՝ Բրիժիտը ծնվել է Ժան-Միշել Տրոնո անունով, ենթարկվել է սեռի փոփոխության վիրահատության և մասնակցել է ապագա նախագահին գայթակղելու «դավադրությանը»: Իրականում Ժան-Միշել Տրոնոն Առաջին տիկնոջ ավագ եղբայրն է, որը վարում է մեկուսացված կյանք։

Տասը մեղադրյալները՝ ութ տղամարդ և երկու կին, 41-ից 65 տարեկան, այդ թվում՝ տեղեկատվական տեխնոլոգիաների մասնագետ, ուսուցիչ և քաղաքային խորհրդական, կարող են դատապարտվել մինչև երկու տարվա ազատազրկման, եթե դատարանը նրանց մեղավոր ճանաչի։ Բոլորը հերքում են մեղադրանքները՝ հղում անելով հումորին և խոսքի ազատությանը։

Դատավարությունը Ֆրանսիայում սկսվել է Մակրոնների կողմից բազմիցս առցանց մեղադրանքների վերաբերյալ դատական հայց ներկայացնելուց երկու տարի անց, և զույգի կողմից ԱՄՆ-ում զրպարտության հայց ներկայացնելուց երեք ամիս անց՝ պահպանողական հաղորդավարուհի Քենդիս Օուենսի դեմ նմանատիպ հայտարարությունների համար։