Կանաչ թեյի հակաօքսիդանտը կանխում է Ալցհայմերի հիվանդությունը․ GeroScience
Բնական նյութերի՝ նիկոտինամիդի (վիտամին B3-ի տեսակ) և կանաչ թեյի հակաօքսիդանտի՝ էպիգալոկատեխինի գալատի համակցությունը կարող է պայքարել Ալցհայմերի հիվանդության դեմ։ Այսպիսի եզրակացության են եկել Իրվայնի Կալիֆորնիայի համալսարանի գիտնականները։ Հետազոտության արդյունքները հրապարակվել են GeroScience ամսագրում։
Լաբորատոր պայմաններում նման թերապիան վերականգնում է գուանոզինտրիֆոսֆատի (ԳՏՖ) մակարդակը մկների ծերացող նեյրոններում և ակտիվացնում ուղեղի ինքնամաքրման մեխանիզմները։ Նյութերի համակցությունը նաև օգնում է նեյրոններին ազատվել ամիլոիդային սպիտակուցներից, որոնք Ալցհայմերի հիվանդության հիմնական նշաններից են։
«Տարիքի հետ ուղեղը կորցնում է վնասված բաղադրիչները վերամշակելու կարողությունը։ Մենք պարզեցինք, որ ԳՏՖ-ի մակարդակի բարձրացումն օգնում է վերականգնել այս գործառույթը», — բացատրել է աշխատանքի առաջատար հեղինակ Գրեգորի Բրյուերը։
Գիտնականներն օգտագործել են GEVAL լյումինեսցենտային սենսորը՝ ծեր մկների նեյրոններում ԳՏՖ-ի մակարդակը չափելու համար։ Պարզվել է, որ տարիքի հետ հատկապես տուժում են միտոքոնդրիումները՝ բջիջների էներգետիկ կայանները։ Սա խախտում է աուտոֆագիան՝ այն գործընթացը, որի միջոցով բջիջները մաքրվում են վնասվածքներից։
Սակայն նիկոտինամիդի և էպիգալոկատեխինի գալատի համակցությամբ մշակումից ընդամենը 24 ժամ անց, ծերացող նեյրոններում ԳՏՖ-ի մակարդակը վերադարձել է այն դիրքին, որոնք բնորոշ են երիտասարդ բջիջներին։ Արդյունքում ակտիվացել են առանցքային սպիտակուցներ, բարելավվել է էներգետիկ փոխանակությունը, նվազել է օքսիդատիվ սթրեսը և արդյունավետորեն հեռացվել են բետա-ամիլոիդի կուտակումները։
Ըստ հետազոտողների՝ ԳՏՖ-ն կարող է կարևոր, բայց նախկինում թերագնահատված թիրախ լինել ուղեղի տարիքային խանգարումների թերապիայի համար։ Այնուամենայնիվ, ինչպես նշել է Բրյուերը, անհրաժեշտ են լրացուցիչ ուսումնասիրություններ՝ միացությունների առաքման օպտիմալ ձևը գտնելու համար։ Գիտնականը բացատրել է, որ նիկոտինամիդը հաբերի տեսքով (պերօրալ) արագ ապաակտիվանում է օրգանիզմում, ինչը նվազեցնում է բուժման արդյունավետությունը։
