Ջենիֆեր Լոպեսի կիսաշրջազգեստը պոկվել է Վարշավայի համերգի ժամանակ. «Լավ է, որ ներքնազգեստ էի հագել»  

Ջենիֆեր Լոպեսը անմոռանալի շոու է ցուցադրել Վարշավայում՝ իր Up All Night: Live in 2025 շրջագայության շրջանակներում, չնայած հենց բեմի վրա անսպասելի միջադեպին։

Աստղը կուլիսներում փոխում էր զգեստը, երբ նրան բեմ են կանչել. հանդիսատեսը պատրաստվում էր նրա համար երգել «Ծնունդդ շնորհավոր» երգը։ Լոպեսը դուրս է եկել ոսկեգույն փայլուն բիկինիով և ծոպերով կիսաշրջազգեստով, որը պարուհիներից մեկը փորձում էր հենց այդ պահին ամրացնել։

Սակայն, մի քանի վայրկյան անց կիսաշրջազգեստը ընկել է գետնին, հենց այն պահին, երբ արտիստն ասել է. «Շնորհակալություն, Վարշավա»։

Ջենիֆերը մի պահ զարմացել է, բայց արագ իրավիճակը վերցրել իր ձեռքը. նա տպավորիչ քայլել է բեմով՝ ոսկեգույն բարձր գոտկատեղով վարտիքով և փայլուն կոշիկներով, մինչ անձնակազմը և հանդիսատեսը երգում էին Սթիվի Ուանդերի «Ծնունդդ շնորհավոր» երգը։

Լոպեսը սրտանց ծիծաղել է, երբ օգնականը փորձել է կրկին բացել կիսաշրջազգեստի կայծակաճարմանդը, բայց ապարդյուն։ Վերջիվերջո, երգչուհին պարզապես հանել է զգեստի չարաբաստիկ մասը և ժպիտով նետել այն ամբոխի մեջ։

«Լավ է, որ ես ներքնազգեստ ունեի։ Չնայած, խոստովանում եմ, սովորաբար ներքնազգեստ չեմ կրում», — կատակել է երգչուհին։

Billboard Icon Award-ի դափնեկիրը նաև դիմել է այն բախտավորին, ով բռնել է կիսաշրջազգեստը. «Կարող ես պահել այն։ Անհրաժեշտ չէ այն վերադարձնել»։

Երկրպագուները հիացած էին երգչուհու հանգստությամբ և հումորի զգացումով՝ նրան ողողելով շնորհավորանքներով և հիացմունքի խոսքերով։