Lorde–ը հայտնվել է սկանդալի կենտրոնում՝ Պամելա Անդերսոնի սեքս-տեսանյութի պատճառով

Փոփ աստղ Lorde–ը քննադատության ալիքի է արժանացել, երբ Rolling Stone-ին տված անկեղծ հարցազրույցում խոստովանել է, որ դիտել է համացանցում հայտնված Պամելա Անդերսոնի և Թոմի Լիի՝ տնային պայմաններում նկարված սեքս-տեսանյութը, իսկ ավելի ուշ նույնիսկ հղում է կատարել դրան իր նոր երգի տեքստում։

28-ամյա երգչուհին ասել է, որ պատահաբար հանդիպել է սկանդալային տեսագրությանը հոգեմետ թերապիայի սեանսից հետո։ «Ես այն շատ գեղեցիկ էի համարում։ Տարօրինակ էր, որ դիտեցի այն, բայց տեսա երկու մարդկանց, որոնք խենթորեն սիրահարված էին միմյանց։ Դրա մեջ կար ինչ-որ մաքուր բան… Նրանք ցատկում էին նավակից, նրանք երեխաների պես էին, նրանք այնքան ազատ էին։ Եվ ես մտածեցի. «Վա՜յ։ Այդքան ազատ լինելը նշանակում է խոցելի լինել»։

Լորդը հետագայում կրկին հղում է կատարել տեսանյութին իր նոր Virgin ալբոմի Current Affairs երգում։ Երկրպագուները կտրուկ քննադատել են երգչուհուն տեսանյութը ռոմանտիկացնելու համար, որը, ըստ Պամելայի, ընդմիշտ փոխել է իր կյանքը և մեծ ցավ պատճառել։

57-ամյա դերասանուհուն մոտ կանգնած մի աղբյուր Daily Mail-ին ասել է, որ Անդերսոնը ատում է այդ սկանդալի մասին ցանկացած հիշեցում: «Այդ ձայնագրությունը ընդմիշտ փոխեց նրա կյանքը, և դրա հետ կապված շատ վատ բաներ կան: Պամելան ատում է, երբ թեման կրկին բարձրացվում է՝ լինի դա «Պեմ և Թոմի» սերիալում, բամբասանքների, թե լրագրողների հարցերի շուրջ»:

Հիշեցնենք, որ Պամելայի և Թոմի Լիի ինտիմ տեսանյութը գողացվել և տարածվել է առանց նրանց համաձայնության դեռևս 90-ականներին: Էլեկտրիկ Ռենդ Գոտյեն նրանց ավտոտնակից վերցրել է սեյֆը, որտեղ պահվում էր ձայնագրությունը: Տեսանյութը հետագայում տեղադրվել է համացանցում և միլիոնավոր դոլարներ է բերել, բայց Անդերսոնն ու Լին գրեթե ոչինչ չեն ստացել:

Անցյալում տեղի ունեցած բարձր մակարդակի սկանդալից հետո Պամելան վաղուց վերանայել է իր կարիերան և կերպարը: Նա հիացմունքի խոսքեր է ստացել «Վերջին շոու-աղջիկը» ֆիլմում իր դերի համար, ինչպես նաև փոխել է իր ոճը՝ հրաժարվելով բոտոքսից և դիմահարդարումից կարմիր գորգի վրա՝ բնական ծերանալու նպատակով:

Աղբյուրի խոսքով՝ աստղը ցանկանում է, որ մարդիկ իրեն հիշեն իր նոր աշխատանքի, այլ ոչ թե Baywatch –ի կամ արտահոսած տեսանյութի համար: «Նա ուզում է կարևոր և հետաքրքիր նախագծեր անել, ցուցադրել իր տաղանդը և հեռու մնալ անցյալից»։

Մինչ Պամելան պատրաստվում է Լիամ Նիսոնի հետ իր նոր «Naked Gun» կատակերգության թողարկմանը, նա արդեն գիտի, որ իրեն կրկին կհարցնեն սկանդալի մասին։ «Նա չի զայրացել Լորդի վրա, նա նույնիսկ չգիտի, թե ով է նա», — ասում է ներքին աղբյուրը։ «Բայց Պամելան կցանկանար, որ դա այլևս չհիշատակվի։ Նրա համար դա պարզապես գլխացավ է և ցավոտ հիշողություններ, որոնք նա ստիպված է վերապրել անընդհատ»։

 Տպել    |  In English  |  На русском