Հաղթանակից հետո ընկեր Հակոբն ասաց՝ «ապրես»: Երեւի սպասում էր, որ կհաղթեի: Առանց մարզիչների աշխատանքի, անհնար է որեւէ հաջողության հասնել: Իմ այս արդյունքները, ոսկե մեդալը նրանց շնորհիվ է:
Այս մասին NEWS.am Sport-ի թղթակցի հետ զրույցում Խորվաթիայից ասաց սպորտային մարմնամարզության երիտասարդների աշխարհի կրկնակի, Եվրոպայի չեմպիոն, աշխարհի գավաթի խաղարկության հաղթող Համլետ Մանուկյանը:
Ապրիլի 12-ին Խորվաթիայի Օսիեկ քաղաքում անցկացվող սպորտային մարմնամարզության աշխարհի գավաթի խաղարկության չորրորդ փուլում 18-ամյա Համլետ Մանուկյանը հավասարը չունեցավ նժույգ թափեր վարժության եզրափակիչում եւ մեծահասակների պայքարում նվաճեց իր առաջին ոսկե մեդալը (14.633 միավոր):
Համլետ, շնորհավորում եմ ոսկե մեդալ նվաճելու կապակցությամբ: Առաջին մեծ հաղթանակդ է մեծահասակներում: Ի՞նչ զգացողութուններ ունես:
Շատ լավ տպավորություններ ունեմ: Ուրախ եմ, որ կարողացա հաղթել: Երկար էինք պատրաստվել այս մրցմանը: Լավ ստացվեց, իսկապես շատ ուրախ եմ, որ կարողացա ոսկե մեդալ նվաճել:
Ինչպիսի՞ն էր մրցակցությունը մեծահասակների մրցասպարեզում քեզ համար:
Մեծահասակներում մրցակցությունն արդեն շատ ուժեղ է: Օլիմպիական մեդալակիրների, աշխարհի չեմպիոնների հետ ես մրցում, պետք է ավելի զգոն եւ ուշադիր լինես վարժությունդ կատարելիս: Փառք Աստծո, ստացվեց ինձ մոտ հավաքվել եզրափակիչում եւ կատարել վարժությունս:
Որակավորման փուլում ավելի ցածր միավորներ էի վաստակել: Կարեւորը եզրափակիչ դուրս գալն էր: Հիմնական ուժերս դրել էի եզրափակիչի վրա, որպեսզի բարձր միավորներ վաստակեի:
Լարվածություն կա՞ր:
Լարվածություն կար, բայց հաղթահարեցի: Հաղթահարելի լարվածություն էր: Փորձեցի չկենտրոնանալ, որ պայքարում եմ մեծահասակներում: Կարեւոր էր, որ լավ կատարեմ վարժությունս, այդ պարագայում արդեն էական նշանակություն չունի՝ մեծահասակներում եմ պայքարում, թե երիտասարդներում: Միակ տարբերությունն այն է, որ այստեղ արդեն շատ ուժեղ մրցակիցներ են:
Սպասո՞ւմ էիր, որ ոսկե մեդալ կնվաճես:
Ամեն մրցաշարին սպասում եմ, որ ոսկե մեդալով պետք է վերադառնամ: Ամեն ինչ կախված է նրանից, թե ինչպես կստացվի վարժությունս: Այստեղ լավ ստացվեց եւ սպասում էի, որ հաղթող կճանաչվեմ:
Այս արդյունքները, որ կարողանում եմ անել, մարզիչներիս մեծ աշխատանքի արդյունքն է: Առանց նրանց աշխատանքի, անհնար է որեւէ հաջողության հասնել: Իմ այս արդյունքները, ոսկե մեդալը նրանց շնորհիվ է:
Ի՞նչ ասաց ընկեր Հակոբը, մրցելույթիցդ հետո:
Ասաց՝ «ապրես»: Երեւի սպասում էր, որ կհաղթեի:
Ո՞ւմ հետ առաջինը կիսեցիր ուրախությունդ, երբ իմացար՝ դու ես հաղթողը:
Առաջինը խոսեցի իմ անձնական մարզիչի՝ Հայկ Նազարյանի հետ: Այն միավորները, որ հավաքեցի այստեղ, իմ առավելագույնը չէին. սրանից բարձր միավորներ էլ եմ ստացել: Դեռ մի քանի աշխարհի գավաթ էլ ունենք, պետք է շարունակենք մարզումները, որ մյուս փուլերում էլ լավ արդյունքներ ունենանք: Կպատրաստվենք նաեւ Եվրոպայի առաջնությանը, որտեղ, կարծում եմ, շատ ավելի բարդ է լինելու, ավելի մեծ է լինելու մրցակցությունը:
Լուսինե Շահբազյան
