Telegram-ի նոր կանոնների համաձայն՝ մեսենջերը իրավապահ մարմիններին կտրամադրի իրավախախտ օգտատերերի IP հասցեները և հեռախոսահամարները։ Տեղեկությունը հաստատել է Telegram-ի հիմնադիր և գործադիր տնօրեն Պավել Դուրովը։
«Հանցագործներին Telegram-ի որոնումը չարաշահելուց հետագայում հետ պահելու համար մենք թարմացրել ենք մեր Ծառայության պայմանները և Գաղտնիության քաղաքականությունը՝ ապահովելու հետևողականություն ամբողջ աշխարհում: Մենք հասկացրել ենք, որ մեր քաղաքականությունը խախտողների IP հասցեները և հեռախոսահամարները կարող են բացահայտվել համապատասխան մարմիններին՝ ի պատասխան ողջամիտ իրավական հարցումների»,- ասել է նա:
Դուրովը նշել է, որ այս միջոցները պետք է զսպեն հանցագործներին։ «Telegram-ում որոնումը նախատեսված է ընկերներ և նորություններ գտնելու, այլ ոչ թե անօրինական ապրանքներ գովազդելու համար: Մենք թույլ չենք տա չարագործներին խախտել մեր հարթակի ամբողջականությունը մոտ մեկ միլիարդ օգտատերերի համար»,- նշել է նա:
Նա հավելել է, որ Telegram-ում որոնումը թույլ է տալիս օգտատերերին գտնել հանրային ալիքներ և բոտեր, սակայն, ցավոք, այս գործառույթը չարագործներն օգտագործել են անօրինական ապրանքներ վաճառելու համար։
«Վերջին մի քանի շաբաթվա ընթացքում ԱԲ մոդերատորների հատուկ թիմը Telegram-ում որոնումը շատ ավելի անվտանգ է դարձրել: Ամբողջ խնդրահարույց բովանդակությունը, որը մենք հայտնաբերել ենք մեր որոնումների միջոցով, այլևս հասանելի չէ: Եթե Telegram-ի որոնման մեջ վտանգավոր կամ անօրինական բան եք գտնում, խնդրում ենք տեղեկացնել մեզ @SearchReport-ի միջոցով»,- նշել է նա:
Հիշեցնենք, որ Պավել Դուրովը Ֆրանսիայում է, որտեղ նրա նկատմամբ հետաքննություն է իրականացվում։ Նա չի կարող լքել երկիրը և պետք է շաբաթը երկու անգամ ներկայանա ոստիկանություն։
