Գենետիկ հիվանդություն ունեցող տղային փոխպատվաստել են աղեստամոքսային տրակտի հինգ օրգան։ Նա դոնորի էր սպասում ողջ կյանքի ընթացքում, տեղեկացրել է Daily Mail-ը։
Ջեյկոբ Պերեսի մոտ հայտնաբերվել է միկրոթելիկների բնածին աթրոֆիա (MVID), որը խանգարում է նրա օրգանիզմին ճիշտ յուրացնել սնունդը։ Այս հիվանդությունը հանդիպում է հարյուր միլիոն մարդուց մեկի մոտ ամբողջ աշխարհում։ MVID-ը հանգեցնում է քրոնիկական լուծի եւ խանգարում օրգանիզմի կողմից վիտամինների եւ հանքանյութերի մարսմանը։ Բուժում գոյություն չունի, եւ հիվանդները ստիպված սննդանյութեր են ստանում ներերակային ներարկման միջոցով։
Տղային փոխպատվաստել են ստամոքս, հաստ եւ բարակ աղիներ, լյարդ եւ ենթաստամոքսային գեղձ։ Նրա ընտանիքը ինը տարի դոնորի է սպասել, որը պետք է լիներ մոտավորապես նույն տարիքի եւ նույն չափի տղա։ Դոնորին գտան Փիտսբուրգում։ Հիմա տղան ապաքինման երկար ուղի պետք է անցնի. երկու ամիս հիվանդանոցում եւ երեք ամիս՝ վերականգնում։
Միկրոթելիկները աղիների մակաճած բջիջներ են, որոնք պատասխանատու են սննդարար նյութերի յուրացման համար։ Սննդանյութերի քրոնիկական անբավարարությունը MVID-ի դեպքում հանգեցնում է ստամոքսի լորձաթաղանթի ախտահարման եւ վատացնում է ենթաստամոքսային գեղձի մարսողական ֆերմենտներ արտադրելու ունակությունը։ Նման բան կարող է առաջանալ լյարդի ճարպակալման եւ երիկամային անբավարարության դեպքում։
