Բույսերն արդյունավետ կերպով հեռացնում են տարածքի օդից բենզինի թունավոր գոլորշիները, որոնք նպաստում են քաղցկեղի զարգացմանը: Ambius ընկերության հետ համատեղ Սիդնեյի տեխնոլոգիական համալսարանի գիտնականների հետազոտության արդյունքները հրապարակվել են ընկերության կայքում։
Հետազոտողները պարզել են, որ կանաչ պատը՝ բաղկացած տարբեր սենյակային բույսերից, արդյունավետորեն հեռացնում է վնասակար, քաղցկեղ առաջացնող նյութերը։ Ընդամենը 8 ժամում շրջակա օդից հեռացվել է առավել թունավոր միացությունների մինչեւ 97 տոկոսը։
Փակ տարածքներում օդը հաճախ ավելի է աղտոտված, քան փողոցում, ինչն իր հերթին բացասաբար է ազդում հոգեկան եւ ֆիզիզկական առողջության վրա։ Ամենավտանգավոր աղտոտիչներից, որը փողոցից կարող է հայտնվել փակ տարածքում, բենզոլն է։
Բենզինի գոլորշիները շնչելը կարող է թոքերի գրգռվածություն առաջացնել, գլխացավեր եւ սրտխառնոց, իսկ երկարատեւ ազդեցությունը կապված է քաղցկեղի զարգացման բարձր ռիսկի, ասթմայի եւ այլ քրոնիկ հիվանդությունների հետ։
«Մենք չափել ենք բենզոլի պարունակությունը հերմետիկ խցիկում: Մենք հաստատել ենք, որ բույսերը կարող են ոչ միայն հեռացնել օդից ամենավնասակար աղտոտիչները։ Ավելին, բենզոլն ավելի արագ է յուրացվում, քան նվազ վնասակար նյութերը, ինչպիսիք են սպիրտները։ Մենք նաեւ հայտնաբերել ենք, որ որքան շատ տոքսիններ են օդում, այնքան ավելի արագ եւ արդյունավետ են բույսերը վերացնում տոքսինները: Բույսերը հարմարվում են այն պայմաններին, որտեղ նրանք աճում են»,- նշում են հեղինակները:
