Մբապե․ Ցանկանում եմ ունենալ նոր բացահայտումներ, այլ խաղացողների եւ այլ մշակույթների հետ հանդիպումներ
Ֆրանսիական ՊՍԺ-ի եւ աշխարհի չեմպիոն Ֆրանսիայի հավաքականի հարձակվող Կիլիան Մբապեն պատմել է վաստակած գումարների նկատմամբ իր վերաբերմունքի մասին։
«Շատ ավելի կարեւոր է կյանքի հարուստ փորձը, քան վաստակած գումարի չափը։ Ֆինանսական միջոցները նույնպես կարեւոր են, քանի որ մենք ունենք ընտանիքներ, որոնց նկատմամբ պետք է լինել հոգատար։ Բայց ես առաջին հերթին ցանկանում եմ ունենալ նոր բացահայտումներ, ճանապարհորդություններ, այլ խաղացողների եւ այլ մշակույթների հետ հանդիպումներ։
Սկզբում դժվար էր ապրել զգացողությամբ, որ մարդիկ քեզ համարում են աստղ։ Բարեբախտաբար, ծնողներս ինձ չէին հայտնում, թե ինչքան գումար եմ ստանում։ Նրանք ճիշտ էին անում։ Ինչպե՞ս դաստիարակել 14 տարեկան երեխային, եթե նա իմանա, որ մի քանի միլիոն դոլար արժի։
Դրա շնորհիվ ես հիմա հանգիստ եմ վերաբերվում փողերին։ Ես հասկանում եմ, որ դա եւս կարեւոր է, ուրախ եմ, որ ունեմ գումար, բայց դա իմ ամենօրյա մոտիվացիան չէ»,- Մբապեի խոսքը մեջբերում է Get Football News France-ը։
Մբապեի պայմանագիրը ՊՍԺ-ի հետ կավարտվի հաջորդ ամռանը։ Փարիզյան ակումբը չի կարողանում նոր պայմանագրի վերաբերյալ համաձայնության հասնել ֆուտբոլիստի հետ, որը մտադիր է կարիերան շարունակել Մադրիդի «Ռեալում»։
