Դատապարտել Ադրբեջանի ռազմատենչ գործողություններն ու ռազմական հանցագործությունները․ Ջոել Ֆիցգիբոն

Ավստրալիայի պաշտպանության նախկին նախարար, պատգամավոր Ջոել Ֆիցգիբոնը  Խորհրդարանի Դաշնության պալատում Ավստրալիային կոչ է արել հրապարակայնորեն դատապարտել Ադրբեջանի ռազմատենչ գործողություններն ու ռազմական հանցագործությունները՝ 2020 թվականի Արցախյան պատերազմի առաջին տարելիցին ընդառաջ։ Այս մասին հայտնում է Ավստրալիայի Հայ դատի հանձնախումբը:

«Մի շարք երկրներ, այդ թվում՝ Ֆրանսիան, ԱՄՆ-ը և այնպիսի կառույցներ, ինչպիսին  Եվրախորհրդարանն է, իրավացիորեն հրապարակայնորեն դատապարտել են Ադրբեջանի կողմից միջազգային իրավունքի միտումնավոր խախտումները։ Մենք պետք է միանանք աշխարհում շատերին՝ հանրահայտ դարձնելով մեր կարծիքը Արցախում տիրող իրավիճակի մասին և ճանաչելով Արցախի ժողովրդի ինքնորոշման իրավունքը», — հայտարարել է Ջոել Ֆիցգիբոնը:

«Ադրբեջանական ներխուժումը հանգեցրեց շուրջ 5000 հայ երիտասարդների մահվան, ադրբեջանական ուժերը ոչնչացրեցին քաղաքացիական ենթակառուցվածքները, այդ թվում՝ հարյուրավոր դպրոցներ և աղոթատեղիներ։ Ավելի քան 100,000 խաղաղ բնակիչներ տեղահանվել են», — ասել է Ֆիցգիբոնը:

Պատգամավորը նշել է, որ այս հակամարտությունը «մեր միջազգային ճարտարապետության կայունության և կանոնների վրա հիմնված կարգի փորձություն է, և թեստը պետք է անցնել»։