Փետրվարի 13-ին երկրի հյուսիս-արեւելքում 7.3 բալ ուժգնությամբ երկրաշարժի հետեւանքով Ճապոնիայում առնվազն 1.596 բնակելի շենք է վնասվել, հաղորդում է ՏԱՍՍ-ը` վկայակոչելով NHK-ն:
Նշվում է, որ վնասված շենքերի ճնշող մեծամասնությունը գտնվում է հյուսիսարեւելյան Ֆուկուսիմա պրեֆեկտուրայում` 1410 շենք: Աղետի հետեւանքով եւս 186 կառույց է վնասվել հարեւան Միյագի պրեֆեկտուրայում:
Շաբաթ երեկոյան Խաղաղ օվկիանոսում Ճապոնիայի Ֆուկուսիմա պրեֆեկտուրայից դեպի հյուսիս-արեւելք հզոր երկրաշարժ էր տեղի ունեցել: Ցնցումները զգացվել էին Ճապոնիայի հյուսիսային, հյուսիսարեւելյան եւ կենտրոնական մասում գտնվող առնվազն տաս պրեֆեկտուրայում: Օդերեւութաբանության ազգային գրասենյակը նախազգուշացրել է, որ շաբաթվա ընթացքում հետցնցումներ կարող են տեղի ունենալ, այս պահի դրությամբ դրանք ավելի քան 20-ն են: Իսկ երկրաշարժը, ըստ ճապոնացի սեյսմոլոգների, 2011 թվականի մարտի 11-ի երկրաշարժի հետցնցումն էր:
