Ռոբերտ Քոչարյանի եւ մյուսների գործով դատական նիստը. Ինչպե՞ս կվարվի դատավորը (ուղիղ)12:52, 02.04.2021Տարածաշրջան:Հայաստան
Թեմա: Քաղաքականություն
Երեւան քաղաքի Շենգավիթ վարչական շրջանի ընդհանուր իրավասության դատարանում շարունակվում է ՀՀ երկրորդ նախագահ Ռոբերտ Քոչարյանի եւ մյուսների գործով դատավարությունը:
Նիստը սովորաբար անցկացվում է երեքշաբթի օրերին: Այսօր դատավոր Աննա Դանիբեկյանը բացառություն արեց՝ հստակեցնելով, որ ապրիլի 3-ից պաշտպանության նախկին նախարար Սեյրան Օհանյանի փաստաբան Կարեն Մեջլումյանն արձակուրդ է մեկնում:
Սա արդեն երկրորդ դատական նիստն է Սահմանադրական դատարանի որոշումից հետո, որը ՔՕ 300.1-րդ հոդվածը ՀՀ Սահմանադրության 78 եւ 79-րդ հոդվածներին հակասող եւ անվավեր ճանաչեց: Մարտի 25-ին ՍԴ-ն հրապարակեց որոշման եզրափակիչ մասը, իսկ մարտի 29-ին՝ 42-էջանոց լրիվ տեքստը: ՍԴ որոշումը վերջնական է եւ ենթակա չէ բողոքարկման: Պարզ չէ, թե ինչ կարգի տապալման մասին է խոսքը՝ հաշվի առնելով, որ հոդվածն ընդունվել է մի Սահմանադրությամբ, եւ փորձել են փոխել մեկ այլ Սահմանադրությամբ: Ռոբերտ Քոչարյանը, Յուրի Խաչատուրովը, Սեյրան Օհանյանը եւ Արմեն Գեւորգյանը մեղադրվում են հենց այդ հոդվածով՝ սահմանադրական կարգի տապալում: Փաստացի, դատարանը պետք է դադարեցնի այդ հոդվածով քրեական հետապնդում վերը թվարկված անձանց, ինչպես նաեւ նմանատիպ մեղադրանքով այդ գործի շրջանակում անձանց նկատմամբ:
Չնայած դրան՝ մարտի 30-ի նիստում դատավոր Դանիբեկյանը հրաժարվեց դադարեցնել քրեական հետապնդումը եւ հետաձգեց նիստը դատախազների բացակայության պատճառով: Դատախազ Գեւորգ Բաղդասարյանը ծանուցում ուղարկեց, որ ծավալուն միջնորդություն է պատրաստում եւ խնդրեց տեղափոխել նիստը ապրիլի 6-ին: Բացառված չէ, որ մեղադրանքը վերաորակելու փորձ կձեռնարկվի: Մյուս դատախազներից ոչինչ չի ստացվել: Դատավորը նիստը հետաձգել է ապրիլի 2-ին:
