«Փոշմանեցի, բայց արդեն ուշ էր». Լիլի Սարգսյանի շիկահեր կերպարն ու վերաբերմունքը պլաստիկ վիրահատություններին
«Միսս Արմենիա 2017» տիտղոսակիր գեղեցկուհի, մոդել Լիլի Սարգսյանն օրերս դիմել է ոճային փոփոխության: Լիլին փոխել է վարսերի գույնը՝ վերածվելով շիկահերի: NEWS.am STYLE-ի հետ զրույցում, անդրադառնալով մազերը ներկելու որոշմանը, մոդելը խոտովանեց, որ մտավախություն ունեցել է.
«Վարսերս վաղուց էի ցանկանում ներկել, սակայն վախ կար սրտումս, մինչեւ որ եկավ այդ օրն ու միայն վերջին վայրկյանին համաձայնվեցի: Ընթացքում փոշմանեցի, բայց արդեն ուշ էր, իսկ երբ տեսա վերջնական արդյունքը, հասկացա, որ ճիշտ որոշում եմ կայացրել»,-ասում է նա ու հավելում,-«Արտաքին փոփոխությանս հետ զգացել եմ նաեւ ներքին փոփոխություն՝ ավելի շատ կանացիություն եմ հիմա նկատում»:
Լիլին ոճային փոփոխություններին, առհասարակ, լավ է վերաբերվում: «Դրանք հարկավոր են, քանի որ հոգնում ես միշտ նույն կերպարում լինելուց: Հաճախակի պետք է դիմել փոփոխությունների»:
Այնուամենայնիվ, հավելում է,-«Շատ կտրուկ փոփոխությունների հաստատ չեմ դիմի: Շատ գունավոր երանգներով չեմ ներկի մազերս, եթե, իհարկե, դա նկարահանման համար չպահանջվի»:
Մոդելը նաեւ վստահ է, որ պլաստիկ միջամտությունների հանդեպ եւս հետաքրություն չի ունենա.
«Իմ արտաքինի համար շնորհակալ եմ Աստծուն: Չեմ կարծում՝ երբեւէ կդիմեմ պլաստիկ միջանմտությունների, քանի որ հենց այսպես եմ ես ժամանակին կարողացել գրավել «Միսս Արմենիա» մրցույթի ժյուրիի անդամներին ու բացի այդ՝ կարծում եմ՝ բնական գեղեցկությունն ավելի է գնահատվում: Ասեմ ավելին՝ շատերը կարծում են, թե ես վիրահատության եմ դիմել. դա այդպես չէ, բայց, իհարկե, նորմալ եմ վերաբերվում նման հարցերին»:
Ի դեպ, ոճային փոփոխությունների հարցում Լիլին հաճախ խորհրդակցում է քրոջ՝ Աննայի հետ, որը եւս մոդել է.
«Մենք հաճախ ենք հագնում նույն զգեստները, հագուստ գնելիս կամ որեւէ փոփոխության դիմելիս միշտ միմյանցից խորհուրդ ենք հարցնում. գրեթե նույն ճաշակն ունենք: Հիմնականում քույրիկս է խորհուրդներ լսողի դերում լինում, բայց ինքս էլ նրան այդ հարցում չեմ զիջում»:
Այժմ Լիլին զբաղված է ուսմամբ, նաեւ աշխատում է: Իսկ միջազգային մրցույթներին մասնակցելու առաջարկներն այս շրջանում չի դիտարկում.
«Միջազգային մրցույթների մասնակցեու առաջարկներ կան, բայց այս պահին չեմ ցանկանում մասնակցել: Իհարկե, հետագա մասնակցության միտք կա, բայց առայժմ չեմ խոսի դրա մասին»:
