Խարդախներն անօրինական կերպով օգտագործել են Մեգան Մարքլի անունը՝ նիհարելու համար հաբերը գովազդելու համար

Մեգան Մարքլի անունը կրկին հայտնվել է աղմկոտ սկանդալի կենտրոնում, սակայն այս անգամ ոչ Սասեքսի դքսուհու մեղքով։ Նիհարելու համար հաբեր արտադրողներից մեկն ապօրինաբար օգտագործել է Սասեքսի դքսուհու անունը։ Որոշ ռեսուրսներում տեղադրվել են Մարքլի լուսանկարները, որոնք արվել են հղիությունից առաջ եւ հետո, գրությամբ, որոնք նշում էին, թե հաբերը դքսուհուն օգնել են վերադարձնել կազմվածքը ծննդաբերությունից հետո։

Մյուս կայքն ավելի հեռուն է գնացել՝ կեղծ հարցազրույց հրապարակելով Մեգանի հետ։ Դրանում նշվում է, որ հոգնելով հետեւել Հոլիվուդի ստանդարտներին եւ մարզասրահում տանջել իրեն՝ դքսուհին 10 տարվա ընթացքում բաղադրատոմսեր է փնտրել որոնք կօգնեին ազատվել ավելորդ կիլոգրամներից առանց դիետաների ու ֆիթնեսի։

Կեղծիքի հեղինակները նաեւ պնդում են, որ Մարքլը հաբերը թողարկել է «թագավորական ընտանիքի բողոքներին հակառակ», իբրեւ դա իր ամբողջ կյանքի աշխատանքն է։

Բուքինգհեմյան պալատը շնորհակալություն է հայտնել Mirror-ին անցկացրած հետաքննության համար եւ պահանջել դադարել Սասեքսի դքսուհու անունն օգտագործել գովազդային նպատակներով։ «Դա անօրինական է, եւ մենք պատշաճ միջոցներ կձեռնարկենք»,- հայտարարել է Մարքլի ներկայացուցիչը։